Dekrè Granmèt La: reyaksyon MOPOD sou sa kap pase nan peyi a

Mouvman Patriyotik Popilè Desalinyen (MOPOD) reyaji sou pil Dekrè ekip ki sou pouvwa a ap pran li. Dirijan pati politik la, Jean André Victor, tou anonse MOPOD deklare lane 2021 an, Lane Lejitim Defans pou kapote Administrasyon Moïse / Joute-la epi envite tout ayisyen tout plim tout plimaj, pou lanse yon grèv jeneral san rete, nan dat 3 janvye 2021.

Nan yon sosyete Kretyen Vivan, gen tout kalite dekrè pou fè bagay yo mache, men tout dekrè pa menm. Gen dekrè ki soti nan pouvwa politik; gen dekrè ki soti nan legliz; gen dekrè lapwovidans ki soti anba men Granmèt-la tou.
Pandan MOPOD ap salye byen ba lanmò Mèt Gerard Gourgue, gran diyitè dwadelòm devan Letènel, pandan lap di tout Òganizasyon dwadelòm yo, li solidè avek yo nan tout pèsekisyon politik yap sibi, lap transmèt Pèp Ayisyen yon dekrè Granmèt-la voye pou yo; se yon fason pou pèsonn pa dekouraje nan batay pou sove peyi-a, .
Lè w gade Konstitisyon peyi-a depi nan tèt rive nan pye-li
Lè w voye ge w sou pakèt ak bann dekrè dwategòch Administrasyon defakto Prezidan mank e melanj yo rele Jovnel Moïse-la ap pibliye chak jou
Lè w konsidere Prezidan enkonstitisyonel la rantre nan yon dynamyk pou detwi peyi a moso pa moso e pou dechire Leta a pak anpak
Lè w konsidere chak jou anplis, Prezidan twa degout-la pase nan tèt peyi a, ap genyen plis moun kap viktym kidnapin, plis pwopriyetè kap pèdi byen yo, plis sytwayen Bandy ap asasinen, plis ti moun kap mouri grangou, plis manman kap krye e plis moun kap viny pi pòv,
Pou tout rezon sila yo e pou lòt ankò, MOPOD ap fè konnen 4 bagay sila yo:
Fok administrasyon Moïse /Joute-la lage prese prese tout prizonye politik pandan lap mete anba kòd tout asasen, kidnapè ak malfektè kap souse san pèp la.
MOPOD deklare lane 2021 an, Lane Lejitim Defans pou kapote Administrasyon Moïse / Joute-la san vyolans
Granmèt-la mande popilasyon-an mete kanpe Tribunal Popilè nan tout peyi-a pou jije Prezidan de fakto- a, ki mete jenou li sou kou Manman Lwa Peyi-a
MOPOD envite tout ayisyen tout plim tout plimaj, pou lanse yon grèv jeneral san rete, nan dat 3 janvye 2021, pou rekipere tout sa Administrasyon Moïse/Joute-la dwe yo
Si nou tout mache pye pou pye, nap koupe tèt koulèv kap souse san pèp ayisyen-an.

Annie FRANÇOIS

Laisser un commentaire

Ce site utilise Akismet pour réduire les indésirables. En savoir plus sur comment les données de vos commentaires sont utilisées.