Vwayaj ak Iléus PAPILLON nan Lanmou p ap di w

Annatandan piblik la rive apresye zèv tounèf sa Iléus PAPILLON ap gen pou prezante sou albòm li k ap rele « Twazyèm etènite » e k ap soti nan fen ane 2021 an, li deside bay nou yon goute. « Lanmou p ap di w », se yon ti wòch ravèt lotè SÈT PRIYÈ LARI a bay nou kòm zetrenn pou nou met sou kè nou.

Men yon lòsye nan « LANMOU P AP DI W! » natif Pòmago a kite pou nou:

M pèdi kat marenn mwen
M al renmen w nan cheve
Se vre lanmou se tèk bò wonn
Men 7 jou sou 7
2021 fwa
M ap anonse limanite
Kè m se bato avwal van desinen nan plamen tout fanm ki demi vyèj
Ki mele m lari foure dan nan yon powèm
M pote non w nan je chak etwal
M pote vwa w nan pye tout vil
M pote lonbraj ou nan tout mizik
Poudayè
Premye fwa nou bo peyi a te separe vètij li san mezire
Men
Sonje m di w cheri
Sa vil Okap sere pou nou
Lannuit pa ka vòlè l
M peche fraz tankou dlo bouch ou
Lè w pa la
M envante kò w selon tout volonte m
Kiyès ki te di mwen ak ou pa t ap ka lwe yon pati nan syèl la?
Antouka, chak maten nou reveye Bondje nan dòmi lè souf nou ap kwazeleyuit
Ofinal
Sanble
Tank n ap fè ekwasyon ak foli nou
Rale teyori desann nan fè pòtrè lalin
Trase modèl moun ki damou nan gout lapli
Se tank kè nou ap koud…

Iléus PAPILLON siyen powèm sa 3 janvye 2021. Pandan w ap kontinye apresye kalite zèv la, si w kwaze ak li, di Iléus, anpil moun nan Redaksyon an ta renmen konnen ki kote yo ap jwenn « fanm ki demi vyèj » yo.

Annie FRANÇOIS

Laisser un commentaire

Ce site utilise Akismet pour réduire les indésirables. En savoir plus sur comment les données de vos commentaires sont utilisées.