Jounen entènasyonal moniman ak sit: Observatoire du Patrimoine mande otorite yo pou pwoteje eritaj peyi a

Nan okazyon Jounen Entènasyonal Moniman ak Sit yo, 18 avril 2021 an, Observatoire Patrimoine (OBPA) prese atire atansyon ISPAN, Ministè kilti, Komisè gouvènman vil Okap ak tout enstisyon ki konsène, sou gwo danje ki pandye sou yon lye memwa, yon espas istorin nan Vodrèy. Jan nou ka konstate sa nan foto a, abitasyon sila ki se temwen divès batay pou Endepandans Hayti, lese pou kò li kote se endividi k ap dekoupe teren Leta pou vann pa moso. Yo menm rive vann pati kote ki gen vèstij yo, ansyen chemine ak lòt objè enpòtan ki se temwanyaj ak temwen istwa nou kòm pèp.

Observatoire Patrimoine vle fè tout otorite yo konnen, espas sa yo dwe sou gwo pwoteksyon Leta.

Pou sa, Observatoire Patrimoine mande san pèdi pou ISPAN, Ministè kilti ak Komisè gouvènman, pran kontwòl abitasyon sila pou anpeche moun yo fin detwi li.

Observatoire Patrimoine salye kouraj ak detèminasyon Midson JEAN BATARD ki pran foto yo epi fè sa li kapab pou atire atansyon otorite yo nan Nò yon fason pou yo mete aksyon piblik an mouvman kont zak sa.

N ap raple, sa pa gen lontan, endividi kraze plat atè Fort-Réfléchi nan komin Pestel(Sidwès Hayti). Dirijan ki responsab pwoteje byen patrimonyal sa yo pa poze okenn aksyon malgre Observatoire Patrimoine te atire atansyon yo sou dosye sila atravè yon atik nan jounal Le Nouvelliste.

Observatoire Patrimoine raple ISPAN ak Ministè kilti, yon peyi se pa yon jwèt. Istwa, Memwa ak Patrimwàn peyi a fè pati de fondman li. Se yon obligasyon pou pwoteje eritaj peyi a.

Se wòl otorite konsène yo tou pou yo sansibilize kominote yo sou enpòtans sit sa yo gen pou teritwa y ap viv la. Dwe gen yon jesyon patisipativ (aktè konsène + kominite lokal) pou pèmèt gen bon jan pwoteksyon dirab.


Observatoire Patrimoine(OBPA)

E-amil: observatoirepatrimoine.ht@gmail.com

Tél.: +509 37 85 66 33

Laisser un commentaire

Ce site utilise Akismet pour réduire les indésirables. En savoir plus sur comment les données de vos commentaires sont utilisées.