Gouvènman an pa ekate posiblite pou ogmante pri gaz la

Popilasyon an ap monte yon mòn pa do. Anplis ensekirite, lavi chè, chomaj elatriye ki ap vale teren nan peyi a, depi plizyè mwa gaz ra nan ponp. Malgre otorite yo toujou anonse gen kagezon gaz ki vini nan peyi a, malgre chak jou yon bann kamyon gaz chaje kite tèminal yo, popilasyon nan kapital la tankou nan vil pwovens yo toujou oblije al goumen anba ponp pou jwenn yon galon oubyen pran liy me longè. Sa ki chwazi achte l nan lari oblije peye galon an souvan pou 4 fwa pri li vann nan ponp yo. Anpil sitwayen t ap mande otorite nan Leta yo pou aji sou pwoblèm sa, apre Direktè BMPAD la ki toujou ap di gen gaz, tout lòt gran toryan nan Leta yo te rete bèkèkè. Ayè, Minis Finans la, montre l pa bèbè.

Moun ki te espere sitiyasyon an pral retounen kòm sa dwa yo pran yon move pataswèl ak deklarasyon Mouche Patrick Boisvert a. Minis Ekonomi ak Finans la, te pale klè tankou dlo kokoye. Li anonse, yon lòt fwa ankò, Leta ka oblije monte pri gaz la depi kondisyon yo reyini. 

Dapre Minis la, se ak anpil kè sere Leta ap pran desizyon sa. Se akoz kontrent otorite yo ap aji konsa. "Pafwa Leta oblije bay jiska 9 milya goud kòm sibvansyon sou gaz la. Sa ki vin tounen yon chay ki twò lou pou trezò piblik la" dapre sa Minis la fè konnen.

''Chak mwa gouvènman an oblije debloke ant 7 a 9 milya goud kòm sibvansyon gaz. Nou pa ka aksèpte sitiyasyon'' te pousib minis ekonomi ak finans lan pandan l te pwofite presize se ti kras pa ti kras yo pral ogmante pri gaz la.

Rèsponsab ministè te pwofite fè konnen gen dispozisyon ki ap pran pou ede moun ki pi vilnerab yo san l pa bay detay sou kijan ni kòman sa pral fèt.

Marckendy DORSAINVIL

Thèmes associés

• Pri
• Gaz
• Ogmantasyon