Delege Présumé di pa gen kanpe !

Lè yon otorizasyon lamer Okap te bay yon biznis anplis pou konstwi sou twotwa boulva Okap la te pran lari, anpil moun ak estrikti pami yo Kenbe Kapòw te leve vwa yo pou raple twotwa pa pou biznis.  Nan yon nòt estrikti a te ran piblik jou ki te 16 desanm 2025 la, mouvman sitwayen sa k ap goumen kont koripsyon ak move gouvènans te mande lameri pou bay eksplikasyon pandan li te raple se yon espas piblik pou moun pwomennen, yon vitrin touristik epi yon patrimwan touristik.

Kontrèman a Meri a, Delegasyon Nò a pa t pran tan pou reyaji epi te bay yon delè 3 jou pou sa ki sou twtwa a demoli. Se konsa apre ekspirasyon delè a, jou ki te 23 desanm pase a, Delegasyon ansanm ak Komisè Gouvènman an Mèt Eno Zéphirin epi Angie Belle kòm reprezantan meri a te ale sou boulva a ansanm ak lapolis te deplase ak yon traktè epi demoli plizyè barestoran ki te okipe twotwa yo.

Apre operasyon sa anpil moun t ap mande kòman meri a fè patisipe nan operasyon an pandan se menm meri sa ki bay otorizasyon ? Genyen tou ki t ap mande si Delege a konte kontinye ? Yon sous pwòch delegasyon an pote repons pou dezyèm nan kesyon an. Dapre sa li fèn konnen operasyon yo ap rapousib apre fèt fen dane yo. « Gen bòykòt lameri ak Direksyon Depatmantal Lapolis la pou ta kanpe operasyon kraze biznis ki pran espas sou boulva a. Yo kanpe men apre fèt yo Delege a ap retounen frape ankò. Epi gen chèz k ap prepare pou mete sou boulva a pou moun ka chita jan sa te ye avan » te fè n konnen sitwayen sa ki pa t vle non l site paske dapre li « Se gwo jimnastik Delege a ak Komisè Gouvènman an te fè ki vin bay travay sa ou wè a. Angie Bell pa sou koze konsa vre ».

Dosye sa montre aklè gen yon fòs ponyèt ant ajan ekzekitif enterimè yo ak delegasyon an, kiyès k ap ranpòte lamayòt ? Èske se lalwa oubyen rapò fòs ki pra l tranche ?  Sèl sa nou konnen gen ti lis ki gentan ap sikile pou ranplase delege a.

Louvencky FRANÇOIS

A lire aussi

• Konbyen kòb Anbasad Taïwan bay Meri Okap menm ?

Thèmes associés

• Marc Merzius Presume
• Okap
• Boulva