Konbyen kòb Anbasad Taïwan bay Meri Okap menm ?

Kèk jou avan 100 premye jou Angeline Bell nan tèt Meri Okap, nan yon lèt tou louvri, jounalis Andy Pierre kritike ekip tou nèf la epi mande majistra a pou bay gouvènans li yon lòt oryantasyon pou evite li echwe jan sa anonse a. Pil fatra tribò babò, kannal ki bouche ak divès lòt move kondisyon moun Okap ap viv te pouse jounalis la ekri lèt tou louvri sa bay Meri. Malgre inisyativ otorite minisipal yo pran tankou Samdi Sitwayen epi bèl ti foto kote yo ap netwaye vil la Meri a pa janm neglije pibliye, sa pa anpeche vil Okap sal tankou peny ti dan ki pèdi nan gran chimen. Yon sitiyasyon ki revòlte anpil pitit vil la ki toujou reyaji, yo chak nan fason pa yo.

Konseye Prezidansyèl Emmanuel Vertilaire kòm ansyen jij nan vil Okap pa t bliye vil la. Dapre sa li fè konnen sou Twitè (ansyen X) ayè 27 novanm 2025 la, li gen kèk mwa ap fè demach pou vil la. « Apre demach m te fè dènye mwa sa yo, Anbasad Taïwan remèt Meri Okap yon chèk 200 000 dola ameriken. Direktè Kabinè m nan te reprezante m nan seremoni ofisyèl la bò kote Anbasadè a ak Majista komin Okap la. Lajan sa, nou jwenn nan kad kolaborasyon nou ak Taïwan, pral sèvi pou soutni yon seri aksyon proyoritè pou vil la, tankou nan enfrastrikti, asenisman, ekleraj piblik, jesyon fatra ak ranfòsman sèvis minisipal yo » te fè konnen Konseye prezidansyèl la ki pa t manke raple « angajman l pou mobilize patnè entènasyonal anfavè devlòpman Okap ». Piblikasyon konseye a te ka pa atire atansyon si pa t gen yon ti dekalaj ant mesaj li a ansanm ak sa Biwo kominikasyon Meri a te pibliye depi 22 novanm.

Dapre kominike ofisyèl Meri a, nan kad seremoni remiz ofisyèl soutyen Taïwan ki te fèt 21 novanm nan, komisyon minisipal la te resevwa « yon enpòtan apwi finansye nan men anbasad Repiblik Lachin (Taïwan) an Ayiti, pou reyalize pwojè Asenisman Fòmasyon epi Akonpayman Fanm ». Pami moun ki te prezan yo, Meri a pa manke fè konnen chèf kabinè Konseye a te la tou. Nan entèvansyon l, Majistra vil la Angeline Bell te fè konnen apwi finansye anbasad la ap soutni yon pwojè ki reponn a 2 priyorite vil la « amelyorasyon pwòpte nan vil la epi otonomizasyon ekonomik fanm ki soti nan katye vilnerab ». Anbasadè Hu Cheng Hao bò kote pa l te raple volonte Taïwan pou kanpe bò kote Ayiti nan reyalize pwojè konkrè ki ka amelyore kondisyon fanmiy vilnerab ap viv.

Pa rapò a chif Meri a pa t bay sou apwi finansye sa ki dapre li « reprezante yon etap enpòtan nan jefò pou kenbe vil la pwòp, dinamize ekonomi lokal epi ofri lòt opòtinite bay fanm Okap » nou oblije poze tèt nou kesyon si 200 000 dola ameriken ka fè tout koze sa yo ? Otorite isit abitye al resevwa 400 kit, 1 350 tòn diri, kèk grenn bokit oubyen boul foutbòl epi pale tankou se pi gwo don yo te ka jwenn, èske se menm bagay la k ap kontinye ?

Stevens JEAN FRANÇOIS

Thèmes associés

• Taïwan
• Okap
• Don
• Emmanuel Vertilaire
• Angeline Bell