Nan Okap, PNCS selebre anivèsè li anba siy rekonesans ak devouman

Selebrasyon an, ki te dewoule nan yon atmosfè meditasyon ak rekonesans, te depase dimansyon yon senp seremoni komemoratif. Li te bay responsab yo okazyon pou fè yon bilan sou chemen enstitisyon an depi kreyasyon li, pandan yo te mete aksan sou wòl estratejik pwogram nan nan amelyore aksè timoun yo ak yon repa cho pandan jounen lekòl la.

Nan mesaj ki te pwononse apre selebrasyon ekaristik la, responsab Kowòdinasyon Depatmantal Nò, Mesye Islan Blaise, te fè remake ke 29 lane egzistans PNCS yo tradui yon istwa ki bati sou rezistans, inovasyon ak angajman. Daprè li, chak etap ki franchi pandan prèske twa deseni yo se rezilta efò kolektif fanm ak gason ki mete sèvis piblik, entegrite ak pwofesyonalis nan sant aksyon yo.

« Se pa sèlman yon anivèsè n ap selebre. Se fidelite Bondye, se devouman plizyè jenerasyon anplwaye ak angajman tout moun ki te kontribye, depi kreyasyon enstitisyon an, pou akonpli misyon li », te souliye responsab la devan asistans lan pandan li te raple tou malgre divès difikilte pwogram nan rankontre pandan ane yo, chak defi te sèvi kòm yon opòtinite pou amelyore fason enstitisyon an akonpli misyon li. Pou li, se lafwa, solidarite, respè pou diyite moun ak sèvis byen komen ki dwe kontinye gide aksyon PNCS nan ane k ap vini yo.

Moman ki te plis touche asistans lan se lè seremoni an te pran yon poz pou rann omaj ak Evans Verdieu, yon anplwaye PNCS ki mouri dènyèman. Apre selebran an te fin fè entansyon priyè espesyal pou li, Mesye BLAISE te salye memwa yon kolèg li dekri kòm yon moun devwe, ki te toujou akonpli travay li avèk serye epi ki te bati bonjan relasyon ak kòlèg li yo. Li te envite tout fanmi PNCS la pou konsève souvni kontribisyon li kòm pi bèl omaj yo kapab rann li. Priyè espesyal te monte pou repo nanm defen an, pandan pawòl rekonfò te adrese bay fanmi li ak tout moun disparisyon sa a afekte.

Nan menm entèvansyon an, responsab depatmantal la te rann yon omaj espesyal bay Kowòdonatè Jeneral PNCS la, Mesye Lucson PHILEMOND, pou vizyon li, sans responsablite li ak angajman li nan ranfòse aksyon enstitisyon an. Li te salye tou travay Chèf Kabinè a, Mesye Wilson Joseph, li prezante kòm yon kolaboratè ki jwe yon wòl enpòtan nan kowòdinasyon aktivite yo ak nan akonpayman administratif pwogram nan. Pou responsab PNCS nan depatman nò a, kalite lidèchip sa a kontribye nan konsolide kilti ekselans ak sèvis piblik ki dwe kontinye karakterize PNCS.

Islan BLAISE te pwofite okazyon an pou remèsye tout anplwaye, kad, patnè ak zanmi enstitisyon an pou angajman yo pandan ane yo. Li te envite tout aktè yo pou kontinye mete fòs yo ansanm pou ranfòse kapasite pwogram nan ak amelyore sèvis li bay kominote lekòl yo. « Se ansanm nou pi solid. Se ansanm nou kapab kontinye bati yon enstitisyon ki merite konfyans popilasyon an epi ki reponn avèk efikasite ak misyon li », li te deklare.

Mès aksyon de gras la te fini ak remèsiman pou Revérend Père Fride Cantave, Gran Koral Notre-Dame d'Altagrace Kominote Lafwa Bèlè, gwoup mim yo, mizisyen yo ak tout moun ki te kontribye nan òganizasyon selebrasyon an.

Nan yon kontèks kote kesyon sekirite alimantè ak siksè lekòl rete pami gwo defi peyi a, anivèsè PNCS sa vini kòm yon rapèl sou enpòtans yon pwogram ki, depi prèske twa deseni, kontinye akonpaye sistèm edikatif ayisyen an nan efò li pou ofri elèv yo pi bon kondisyon pou aprann.

Abigaelle PIERRE

A lire aussi

• Nord : les acteurs de l'alimentation scolaire plaident pour un renforcement des partenariats
• Grande-Rivière du Nord accueille le lancement du Projet « Jardins Scolaires »
• Le MENFP a demandé à la coordonnatrice sortante de restituer tous les matériels du PNCS
• Des organisations saluent l’installation de Kevenot Dorvil au poste de Coordonnateur National du PNCS
• Détournement de denrées alimentaires dans le Nord, le PNCS ouvre une enquête

Thèmes associés

• PNCS
• Islan Blaise