Toutotan pa gen sit dechaj, Okap p’ap janm pwòp, dapre Majistra Yvrose Pierre

Vakans dete rive, ensekirite nan zòn metwopolitèn nan fè anpil moun ap reflechi ki kote yo prale pou yo ka respire yon lòt lè e sitou kouri dèyè estrès lavi a. Bandi Matisan dekouraje anpil ki te vle mete tèt pou sid. Anpil dyaspora anvi vini lakay pou kèk jou. Men yo poko wè ki kote yo ka alèz vre. Se pandan anpil moun gen enkyetid sa yo epi ap chèche solisyon, yon eslogan parèt sou rezo sosyal yo : Pa al Ayiti ni Repiblik Dominikèn, vin Okap! Pou moun ki dèyè koze sa, randevou a pa lòt kote, se nan kapital istorik ak touristik peyi a.

Se vre, pa gen pi bon moman pou yon moun ta deside vin fè yon kout pye nan nò peyi a. Nou nan epòk fèt chanpèt. Chaje aktivite pou moun ka distrè yo: bal, lanmè, restoran, sit touristik, elatriye. Poutan, pandan ke gen tout angouman sa, genyen kèk aktè ki montre retisans yo. Dapre yo, vil la twò sal pou yo ta va envite moun vin ladan li.

Si gen yon bagay yo pa twonpe yo sou li, se eta vil la ak pil fatra tribò babò. Devan sitiyasyon sa, anpil moun lage responsablite a sou do otorite ki nan Meri vil la. Dapre yo, majistra yo pa fè anyen pou chanje eta vil la. Prezidan Komisyon minisipal Kap Ayisyen an, Yvrose Pierre, nan yon entèvyou li te bay Gérard Maxineau pou MédiaMax bay detay sou pi gwo pwoblèm vil la : pa gen kote pou mete fatra yo!

Dapre majistra a, pwoblèm vil la grav e li pa gen 2 solisyon! Se sit dechaj la. "Jan Okap ye la, pwoblèm Okap depase Meri a, vwa yon gwoup moun. Toutotan nou pa gen yon pwen darive, toutotan nou pa gen yon sit dechaj kote lè fatra a ranmase li transfòme swa an gaz, papye, kèlkeswa sa yo ap fè ak li a, Okap p’ap ka pwòp paske nou gen plis pase 20 tan se deplase nou deplase fatra" se sa l te deklare pandan l te retounen sou dosye sit dechaj Banque Mondiale finanse pou zòn nan e ki t’ap itil Okap anpil.

"Nou konnen tout batay Meri Okap, Meri Katye Moren, Meri Limonad mennen pou gen yon sit dechaj, m ap pale de Mouchinèt. Sa te gen yon bann monte desann, yon bann rale vini. Majistra yo menm gen tit dechoukè. E w’ap gade jounen jodi a, Majistra Gesner, yonn nan moun ki te goumen ansanm ak nou pou nou te ka genyen sit dechaj sa, jodi a li nan prizon".

Depi plis pase 2 mwa, Majistra Gesner Dieudonné ak 2 pwòch li, pami yo yon pitit gason li, nan prizon. Lapolis te arete li kèk jou anvan seremoni pou lanse travay konstriksyon sit dechaj la. Dapre anpil moun, se akoz dosye sa menm ki fè li dèyè bawo jodi a paske depi soti nan tè kote sit dechaj la ap fèt la rive sou koze fatra ki se politik Okap sitou, li te vin gen anpil moun ki gen pwoblèm ak li.

Pandan tan sa, vil Okap sitou ap mande fatra padon. Labank Mondyal finanse pou netwaye rivyè Odikap poutan sa pa ka fèt. Majistra Yvrose te bay rezon ki lakoz sa. "Rivyè Odikap pa ka drene. Sa k fè l pa ka drene, se paske pa gen kote pou mete dechè yo. E lè w gade, si w pase Odikap w ap wè ni pon an ni rivyè a fè yon sèl paske toutotan nou pa gen sit dechaj la, vil la pa ka pwòp". Li te pousib nan bay detay sou ki kote lajan pou fè sit dechaj sa ye. "Sit dechaj lan la, lajan ki la pou sit dechaj la ke Banque Mondiale finanse se Pòtoprens lajan an rete. Lajan an nan Ministè finans".

Pou ede konbat fatra nan vil Okap, plizyè inisyativ sitwayen parèt. Menm jan ak otorite lokal yo, yo konfwonte a absans sit pou jete fatra yo. Depi apre arestasyon Gesner Dieudonné ki se Prezidan komite pwojè sit dechaj k’ap gen pou jere fatra yo, anpil moun pèdi lespwa pou yo ta wè yon Okap pwòp menm jan sa te ye lontan.

Stevens JEAN FRANÇOIS

Thèmes associés

• Vil Okap
• Yvrose Pierre
• Sit dechaj
• Fatra