Ariel rèd kou ke makak!

2 jou avan yo asasinen l, Prezidan Jovenel Moïse te nonmen Ariel Henry Premye Minis. Doktè sa yo te prezante kòm moun ki gen bon relasyon ak Babekyou, chèf federasyon gwoup gang ki rele G-9 an Fanmiy e alye, a te gen pou misyon pou l ka mete sou pye yon gouvènman kote plizyè gwoup nan sosyete a t ap reprezante, rezoud pwoblèm ensekirite a epi akonpanye konsèy elektoral ki te an plas la pou fè eleksyon. Yon ane apre se rèl kay Makorèl.

20 jiyè pase a, PM nan, nan yon ti bat bouch ak nasyon an, te pwofite raple tout moun misyon gouvènman li ap dirije a. "M ap fè tout moun sonje, misyon gouvènman m gen onè ap dirije a se kreye kondisyon pou eleksyon onèt, transparant epi demokratik rive fèt, pou pase pouvwa a nan tan ki pi kout posib la, bay moun majorite ayisyen ak ayisyèn ap chwazi" se sa PM nan te deklare san fè wout kwochi.

Li te tou kontinye envite tout sektè vin chita diskite ansanm pou jwenn solisyon a pwoblèm k ap brase bil peyi a. "Mwen kwè dyalòg se pi bon zouti pou rezoud pwoblèm politik yo. Se wout ke m chwazi a jiskaprezan, e m pa gen lide kite l. Yon dyalòg fran epi sensè ant tout sektè lavi nasyonal la. Sèlman bandi pa ladan l. M espere chak moun ap konprann sa epi ap kontribye ak bòn fwa epi volonte pou li abouti. Nou oblije mete sou yon menm tab pati politik yo, men tou aktè ekonomik ak sosyal yo pou n bati ansanm yon pwojè nasyonal pou Ayiti nou vle kite pou pitit ak pitit pitit nou" te raple PM nan pandan l te pwofite fè konnen dyalòg sa pa dwe yon okazyon pou pèdi tan nan diskisyon ki pal pitit anyen epi k ap fè soufrans pèp la dire plis menm jan ak enstabilite sa ki la depi kèk tan an.

"Mwen konnen premye bagay konpatriyòt mwen yo vle se pou sekirite retounen tabli nan peyi a. Gouvènman nan ap travay san pran souf. Ak èd lapolis la, nou kòmanse jwenn kèk rezilta" te pouswiv PM nan ki te tou pwofite salye entelijans ak matirite popilasyon an ki konprann gouvènman an oblije monte pri gaz la. PM nan pa t pran tan prezante bilan sa li fè pandan ane li sot pase sou pouvwa a.

N ap raple PM Ariel Henry te nome 5 jiyè men se finalman 20 jiyè li te rive enstale nan tèt gouvènman an. Jounen jodia, san poko gen konsèy elektoral ni dekrè elektoral, PM nan di se moun k ap soti nan eleksyon l ap remèt pouvwa a. Dapre kèk aktè ki abitye patisipe nan reyalize eleksyon isit, si PM nan rete sou pozisyon l, se 7 fevriye 2024 pou pi bonè l ap kite pouvwa a.

Annie FRANÇOIS

A lire aussi

• Ariel chanpyon!
• Ariel Henry, audace? En-veux-tu, en voilà...
• Ekonomi: Bilan yon ane Ariel Henry, se apse sou klou
• Politique : Moïse Jean-Charles fait commerce de ses charmes
• Mouche Ariel ou p ap dirije anyen, se pa move nouvèl ?
• Les États-unis croient qu'Ariel Henry peut organiser les élections
• Ariel, kote fig la?

Thèmes associés

• Ariel Henry
• 1 an