Steven Benoit ant popilarite espontane ak limit estrikti politik Ayiti

Apre batay pou salè minimòm nan te fin pase nan 2 chanm Palman an, non Depite Steven Benoit te vin tounen yon senbòl nan konsyans kolektif la. Ansyen depite Petyonvil la te rive touche yon nivo popilarite ekstrawòdinè. Travayè, jèn, ak entèlektyèl te wè ladan l yon modèl defansè klas ouvriyè a. Fenomèn sa a ka esplike selon apwòch sosyolojik idantifikasyon karismatik, kote pèp la idantifye ak yon figi ki parèt kòm “sovè sosyal” li. Nan sans sa, Benoit te vin tounen yon « ewo moman an », yon repons emosyonèl ak yon sosyete ki bouke ak inegalite.

Sepandan, jan syans politik eksplike l, okenn popilarite pa dire si li pa gen estrikti ki vin ranfòse l epi kapasite pou jenere vizyon dirab. Tranbleman tè 12 janvye 2010 la, kòm gwo chòk nasyonal, te vin modifye tout balans politik ak ekonomik peyi a. Pwoblèm imanitè, dezòd enstitisyonèl ak depandans entènasyonal la te kreye yon nouvo reyalite kote karism pa t sifi ankò. Nan kontèks sa a, Steven Benoit, malgre bon volonte li, te pèdi direksyon estratejik la li antre nan Sena a, men pa t rive transfòme kapital politik li an mouvman estriktire.

Ka Benoit a se yon bon etid pou konprann fason pèp ayisyen pratike politik. Plizyè analiz sosyosikolojik montre aklè kòman nan yon sosyete kote enstitisyon yo fèb, desizyon elektoral yo souvan pran sou baz emosyon, senpati, oswa efè « mèsi pèsonèl » olye de evalyasyon rasyonèl sou kapasite ak vizyon kandida yo. Nou remake menm dinamik sa a nan sipò ki leve pou Komisè Muscadin jodi a ki se yon transfè afektif plis pase yon kalkil politik. Fenomèn sa a tradui mank edikasyon sivik ak absans yon kilti politik reflechi nan sosyete a.

An reyalite, Ayiti ap plede repete yon sik kote pèp la « vote ak kè » olye li « vote ak tèt ». Se yon erè ki, dapre analiz syantifik sou konpòtman elektoral, mennen nan enstabilite ak dezilizyon kolektif. Chanjman reyèl la dwe pase pa fòmasyon politik, analiz objektif, ak konstriksyon estrikti solid ki depase karism endividyèl yo.

Nan yon peyi kote emosyon ranplase rasyonalite, demokrasi tounen yon senp teyat santiman.

Thèmes associés

• Steven Benoit
• Jean Ernest Muscadin