Poukisa yon paran dwe founi je nan telefòn yon timoun?

Depi 2012 Òganizasyon nasyon zini rekonèt aksè a entènèt kòm yon dwa fondamantal tout moun dwe jwi. Se vre tout moun sou tè a poko rive jwi dwa sa, men chak ane gen plis moun kap itilize entènèt. Sa ki pa depaman an Ayiti. 

Chak ane gen plis ayisyèn ak ayisyen tout laj, tout kouch ak klas sosyal ki itilize entènèt. Entènèt la ede moun fè anpil aktivite, li fè moun jwenn tout jan de enfòmasyon nan yon tan ki tou kout. Li fasilite lavi moun se vre men se pa tout bagay ki bon pou lespri moun, sitou timoun. Se pou yon paran dwe asire l, li mete kontwòl pou yon timoun pa tonbe sou sa ki ka bay li anpil pwoblèm.

Pami sa ki ka bay timoun nan pwoblèm nou ka site imaj, videyo oubyen kontni ki gen pou wè ak sèks; kontni k ap fè pwomosyon vyolans, k ap ankouraje moun rayi yon lòt; jwèt sou entènèt ki ka lakoz timoun nan pa gen tan pou l etidye, fè devwa l elatriye. Gen granmoun tou ki konn ap kominike ak timoun epi eksplwate inosans yo. Gen anpil lòt rezon pou pran an ta founi je toujou men kòman l ap ka fè sa pandan li pa ka toujou la lè timoun nan ap itilize telefòn, tablèt oubyen òdinatè a?

Pou siveye epi limite kisa timoun nan ap jwenn sou entènèt, paran an dwe mete yon sistèm kap anpeche timoun nan jwenn yon seri kontni ki pa bon pou laj. Aktive kontwòl parantal se yon bon opsyon tou.

Granmoun yo di, je fon kriye davans. Paran yo dwe pran tout mezi pou pwoteje timoun yo pou yo ka devlope san pwoblèm. Erezman gen zouti ki pèmèt yo pwoteje timoun yo menm lè li nan gwo mond entènèt la pou kò l.

Sous:

https://www.laptitesauterelle.fr/comment-utiliser-une-application-de-controle-parental-pour-le-telephone-de-vos-enfants/

Abigaelle PIERRE

A lire aussi

• 3 rezon pou w pa bay timoun medikaman ki pou granmoun

Thèmes associés

• Entènèt
• Kontwòl
• Paran
• Timoun
• An Kreyol