Gouvènman dominken an pa ekate posiblite pou devye rivyè Masak la

Wikenn ki sot pase a, Prezidans Repliblik Dominikèn anonse enstalasyon 3 ponp pou rale dlo nan rivyè Masak la. Yo mete ponp sa yo yon ti kras pi wo kannal ayisyen yo ap konstwi a. Dapre sa yo deklare ponp sa yo, ki ka rale 3 mil a 6 mil 5 san gallon dlo nan rivyè a, ap ede yo garanti moun k ap plante lakay yo jwenn dlo pou jaden yo. Apre reyaktivasyon kannal La Vigia, pouvwa dominiken an kontinye ap pran dispozisyon pou redwi kantite dlo kannal konpatriyòt ayisyen yo ap konstwi pou jwenn dlo pou wouze 3 mil ekta tè nan plèn Maribawou. Apre sa Luis Abinader te deklare nan LA Semanal 25 septanm ki sot pase a, sa nou wè la ka poko anyen.

Pou kenbe angajman l pou gen yon dyalòg ak sitwayen yo, pouvwa dominiken an mete sou pye yon platfòm komikikasyon tou nèf « LA Semanal ak laprès » ki se yon espas kote Luis Abinader fè yon bat bouch ak laprès. Nan Salòn de Las Cariàtides, chak lendi a 4 trè 30 nan apremidi, Prezidan dominiken an bay jounalis yo randevou. Jou ki te 25 septanm nan, dosye kannal la domine randevou sa. Patisipan yo pa t nan tete lang ak Prezidan an.

Patisipan pa t rive konprann desizyon gouvènmn an pou kreye konfli nan nivo sa pou yon rivyè ki pa bay anpil dlo pandan 9 mwa nan ane. Colombia Alcantara ki ap travay nan  «Una nueva mañana», yon emisyon ki pase soti lendi pou rive vandredi nan Teleradio América, te ale pi lwen li menm. Li pat manke atire atansyon sou kokenn chenn solidarite ayisyen yo rive devlope sou koze kannal la : « Nan anpil bagay, ayisyen yo pa janm mete tèt yo ansanm. Men, fwa sa atis yo, moun nan diaspora a, anpil gwoup nan sosyete a epi otorite yo, pami yo Premye Minis la, mete ansanm pou fè kannal la». Li te pousib pou fè konnen nan emisyon l la, gen yon jounalis ki fè revele komite ki responsab pou fè kannal la anonse yo ap inogire l 18 novanm. Pa rapò a enfòmasyon sa yo, li te mande prezidan an kisa Repiblik Dominikèn pral fè ? Li te retounen sou plan ki te anonse pou soutni biznisman yo pandan l te raple Prezidan an fwontè pa ka ret fèmen pou tout tan paske Ayiti se yonn nan pi gwo patnè  komèsyal ladominikani.

Prezidan Luis Abinader te reponn konsa «Tande m Colombia, m ap repete menm bagay m sot di a. Nou pran kèk mezi ijans […]  si nou kakab devye dlo a yo pral jwenn yon ti kras dlo. Lè sa li pral difisil pou yo reyalize plan yo gen pou yo jwenn dlo nan kannal yo a».  Kèk jou apre Luis Abinader fin fè deklarasyon sa 3 ponp entale nan rivyè a sou tèt kannal ayisyen yo ap bati a. Eske li ap rive nan pran desizyon pou devye rivyè a ? Si sa fèt ki repons Ayiti ap ka bay ?

Tankou Pè Toma nou pa ka di n ap sib, kannal la p ap kanpe, nou klè sou sa. Men, pandanstan fòk nou defini estrateji epi chèche mwayen pou dlo kannal la rive Maribawou.

Stevens JEAN FRANÇOIS

A lire aussi

• Chanm Komès Ayisyano Afriken pran nesans !
• Etazini mande plis angajman pou soutni Fòs Represyon Gang yo
• Sanksyon nan Legliz Batis : yon zouti restorasyon oubyen yon mwayen pou avili moun ?
• Papa Deslin vin pran yo!
• Lapli vini m a ba w bonbon!
• Se aksyon Konsèy Prezidansyèl la k ap montre si l vle fè ripti vre, pozisyon yon goup sitwayen nan Okap
• Yo koken, yo mètdam

Thèmes associés

• Kannal
• Rivyè  Masak
• Ayiti
• Repiblik dominikèn