Etazini mande plis angajman pou soutni Fòs Represyon Gang yo

Fòs sa a, ki te ofisyèlman etabli nan mwa oktòb 2025 apre fen manda MMAS la, gen pou misyon pou konbat gwoup ame yo, sekirize aks esansyèl yo, epi akonpaye Polis Nasyonal la nan batay kont ensekirite a. FRG a dwe rive genyen 5 500 ajan ak 50 sivil nan ekip administrasyon li, men pou kounye a fòs la poko ka fonksyone, akoz pwoblèm finansman ak reta nan deplwaman twoup entènasyonal yo.

Sekretè Deta Rubio raple ke priyorite aktyèl la se fini faz tranzisyon ant MMAS ak FRG a, yon faz ki mande finansman pou kat premye mwa ane 2026 la. Dapre li, Etazini deja angaje yo pou peye mwatye depans faz tranzisyon ant 2 fòs yo an jiska fen 2025, men rèstan mwa yo dwe jwenn finansman nan men lòt patnè entènasyonal yo.

Sekretè Deta ameriken an te souliye tou nesesite pou jwenn kout men finansye pou Biwo Nasyonzini an Ayiti, ki responsab kowòdinasyon teknik ak siveyans deplwaman an, ansanm ak Fòs Représyon Gang yo, ki bezwen plis enfrastrikti, lojistik ak ekipman.

Yon lòt gwo defi se kesyon twoup yo : Kenya ki deja te deplwaye plizyè santèn polisye an Ayiti nan kad MMAS la pwomèt 2 000 sòlda, men selon Rubio, lòt peyi yo dwe enplike yo. « Nou pa ka kite Kenyan yo poukont yo » li te deklare.

Objektif peyi patnè yo se monte a 5 000 militè pou asire operasyon yo gen enpak reyèl sou teren an. Malgre difikilte yo, responsab ameriken an di gen yon ekip kap travay chak jou sou dosye Ayiti a. Li remèsye Kenya pou efò li deja fè, epi mande kominote entènasyonal la pou bay plis mwayen, plis twoup, plis kowòdinasyon, pou FRG a kapab vin operasyonèl nan tan ki pi kout.

Pandan sosyete ayisyèn nan ap tann aksyon konkrè pou retabli sekirite, deklarasyon Marc Rubio nan G7 la montre klèman : batay la poko ap fini epi lavni FRG a pral depann de solidarite entènasyonal ak angajman dirab.

Abigaelle PIERRE

A lire aussi

• Chanm Komès Ayisyano Afriken pran nesans !
• Sanksyon nan Legliz Batis : yon zouti restorasyon oubyen yon mwayen pou avili moun ?
• Les principaux éléments de la FRG ne seront dans nos murs que durant l’été 2026
• Papa Deslin vin pran yo!
• Lapli vini m a ba w bonbon!
• Se aksyon Konsèy Prezidansyèl la k ap montre si l vle fè ripti vre, pozisyon yon goup sitwayen nan Okap
• Yo koken, yo mètdam

Thèmes associés

• Marco Rubio
• FRG
• Ayiti
• Sekirite