Papa Deslin vin pran yo!

Dapre sa listwa rakonte n, yon 17 oktòb tankou jodia ou te tonbe nan Pon Wonj. Ansanm ak Charlotin Marcadieu ou te tonbe an brav. Asasen w yo te tèlman pè w men m lè yo fin touye w, kadav ou te fè yo tranble. Se pou sa yo te rache kò w miyèt moso. Menm apre yo te fin fè krim nan, chak fwa yo te tande non w, asasen w yo te prèske pipi sou yo. Se pou sa yo te entèdi moun site non w. Yo te pè pou w pa t retounen vin bay tèt ou jistis.

Papa Desalin wi, m lonmen non w pou m reveye w. M oblije rele w pou m mande w pote n sekou! Nan Konstitisyon 1805 la ou te di "sitwayen ayisyen se frè" ou te di tou "pèsonn pa diy pou li ayisyen si l pa bon papa, bon pitit, ni bon mari" jodia papa Desalin anpil bon papa, bon manman, bon pitit ak bon zanmi ap tonbe anba bal asasen. Bandi san fwa ni lwa chwazi vire do bay prensip ou te kite pou nou yo. Yo prefere pran move wout epi yo ap mete dlo nan je frè ak sè n yo.

Jodia a papa Desalin akoz move dirijan, peyi a pèdi diyite l. Pitit ou yo ap pran desepsyon nan men tout peyi. Yo ap kouri kite peyi a pou grangou, pou chomaj, pou mizè, pou ensekirite. Sa ki pa ka kouri kite peyi a ap kouri ladanl. Nan depatman Lwès tankou Latibonit sitwayen pezib ap kouri pou yo ka gen lavi. 700 000 moun pami yo anviwon 350 000 timoun oblije kouri kite lakay yo. Se twòp atò papa! Se pou sa w te goumen. Se pa sa w te vle n gen kòm Eritaj. Ou te vle pou n yon nasyon granmoun tèt li ki t ap senbòl libète, egalite ak fratènite nan figi mond la. Ou te vle n yon egzanp pou tout rès mond la. Jodia papa se pa sa l ye! Sa pa ka konsa, fòk sa sispann! Se pou sa papa n ap mande w souple pran yo! Tout san fwa ni lwa ki lakoz peyi a nan eta sa vin pran yo papa. Mennen yo ansanm ak ou! Sa a sèvi egzanp pou tout sa k ap vini apre. Nou p ap met dèy ankò papa, rad wouj nou pare, pran yo pou n ka libere tout bon.

Stevens JEAN FRANÇOIS

A lire aussi

• Lapli vini m a ba w bonbon!
• Se aksyon Konsèy Prezidansyèl la k ap montre si l vle fè ripti vre, pozisyon yon goup sitwayen nan Okap
• Yo koken, yo mètdam
• 12 janvye 2010, Bondye te sispann bon?
• Jounen entènasyonal dwa moun: Tout moun se moun
• Fondasyon Zanmi Timoun p ap bese bra l
• Gouvènman dominken an pa ekate posiblite pou devye rivyè Masak la

Thèmes associés

• Desalin
• Ayiti