Yo koken, yo mètdam

Kisa kanaval pote pou peyi sa ? Kesyon sa te retounen anpil nan kanaval BIC a. Nan bèl konpozisyon sa, atis la pa t manke envite n gade ansanm ki rezilta nou jwenn nan modèl kanaval nou ap òganize yo. Apre pil mo sal, yayad, diskriminsayon kò fanm, pwomosyon alkòl, vyolans ak koripsyon, pou m site sa yo sèlman, kisa kanaval pote pou peyi sa vre ? Se vre yon moun defoule w men eske w defoule w vre lè w pè pou yo blese w nan foul la, pou lapolis pa baw yon move kout koko makak, pou w pa pran gagann oubyen pou w pa viktim lè w ap antre lakay ou apre kanaval la ? Apre m fin fè yon ti reflechi sou koze sa, m oblije antre nan koral atis la pou m chante, ABA Kanaval !

Kisa kanaval la, jan n òganize l la, pote pou peyi a ? BIC pa t poze kesyon an konsa, men li te pwofite di ki modèl kanaval li vle olye de sa yo ap òganize a. E m dakò ak li. Kanaval la dwe okazyon pou vann kilti nou, valè nou. Kanaval la dwe moman pou n vann bon imaj de peyi a. Se moman pou n fè pwomosyon sit istorik ak touristik yo. Se moman pou n vann manje nou yo. Jou kanaval la fèt nan sans sa, menm si vwa m pa bon, kwè m, m ap chante byen fò viv kanaval. E konnya, kisa n ta dwe di ?

Nan yon kontèks difisil tankou sa n ap viv la nou bezwen rale yon souf. Nou bezwen distrè n se vre men se pa a nenpòt pri ! M p ap pale de konbyen lajan moun peye pou ale nan bal, fimen chicha, fè videyo nan espas VIP pou poste sou IG a. Non ! Ni m p ap janm di tou poukisa menm si bal la 100 dola ameriken pa gen plenyen pou di pa dwe gen bal akoz ensekirite, lavi chè, malsite, elatriye. Se pa mwen ki pral di ta sanble yon gwoup moun pa dwe pran plezi nan peyi sa ! Non se pa mwen, nou nan peyi a nou gen 2 nawè nou e nou gen 2 fèy zòrèy nou. Nou janbe lari pou kò nou epi lè yo bay nou manje nou konn kote pou nou mete l. Pa mete m nan lo souple !

Men vre ! Ak ensekirite a eske ka gen kanaval nan peyi sa ? Moun ap mouri ladanl vre. Moun ap kouri pou bal ladanl wi. Men se nan peyi a nou tout ap kouri pa vre ? Nou ap dòmi nan kabann nou ak tenis nou nan pye n pa vre ? Nou pa konn si bandi p ap pran zòn nan ni tou nou pa konnen si yo p ap vin pran nou lakay nou epi al mete n nan plàn pou fanmiy nou peye. Nou oblije dòmi tou pare, podyab nou. Nan kondisyon sa yo eske se kanaval nou bezwen vre ?

Non ! Se repons la sa. Nou p ap viv nan peyi a. Nou la. Menm lè se pa tout ki la menm jan paske gen anpil nan nou k ap veye imel la pou n lage pye n. Nou pa bezwen kanaval, nou bezwen VIV. Nou bezwen rive jwi dwa ak libète nou. Nou bezwen desinen yon demen miyò pou pitit nou nan peyi a. Se sa n bezwen e pa gen moun ki pral aprann nou sa. Menm jan antreprenè politik ki nan peyi lòk kont Prezidan Jovenel la pa ka ap pale byenfè kanaval jodia. Menm jan moun PHTK yo pa ka ap pale mal kanaval ! Pozisyon yo pa ka chanje an fonksyon de enterè yo ! Nou bezwen moun nan peyi sa. Nou bezwen moun ki pa rete ak moun. Nou bezwen moun ki moun tout bon. Wi, jan BIC di l la n ap chèche yon moun.

Nou bezwen moun ki gen nen nan figi yo. Nou bezwen moun k ap defann enterè mas defavorize a. Nou bezwen ki vle nou jwenn byennèt zansèt nou yo te goumen pou li a. Nou bezwen moun ki pral goumen pou remanbre mouvans popilè antreprenè yo fin detwi a. Nou bezwen moun ki pral aprann moun goumen pou l jwi dwa l. Nou bezwen moun ki ap sispann fè militans tounen pwofesyon. Konsa moun p ap mande peye yo pou ale nan manifestasyon ! Nou bezwen moun vre wi ! Kwè m si w vle kanaval la ap fini pil madigra mal maske sa yo m wè k ap pale byen fò yo, ap rete. Gade yo byen, sonje pozisyon yo ap defann nan depann de sa yo gen nan men yo a. Pa bliye yo koken, yo mètdam.

Stevens JEAN FRANÇOIS

A lire aussi

• Bon konba!
• Chanm Komès Ayisyano Afriken pran nesans !
• Etazini mande plis angajman pou soutni Fòs Represyon Gang yo
• Sanksyon nan Legliz Batis : yon zouti restorasyon oubyen yon mwayen pou avili moun ?
• Papa Deslin vin pran yo!
• Lapli vini m a ba w bonbon!
• Se aksyon Konsèy Prezidansyèl la k ap montre si l vle fè ripti vre, pozisyon yon goup sitwayen nan Okap

Thèmes associés

• Kanaval
• Ayiti
• BIC