Pòdepè: ti bwa k ap pete je n nan?

Anpil moun te sezi lè yo te tande ajan dwanye yo ak lapolis nan yon tèt kole rive fè yon operasyon kote otorite lajistis yo sezi 120 000 bal. Se pa sèlman sa yo te sezi jou ki te premye jiyè pase a, yo te sezi 2 zam 9 milimèt, yon 38, 30 chaje epi 20 pòch pou mete AK-47. Yo te jwenn plizyè mil dola ameriken ak goud tou. Pou sa ki gen pou wè ak 120 mil katouch la yo te separe konsa: 114 000 kalib 5.6, 4 000 kalib 7.62 kidonk 118 mil bal pou gwo zam lagè epi rès 4 mil la te pou 9 milimèt). Dosye sa poko sispann paske menm si Komisè gouvènman Michelet Virgile jwenn arestasyon epi lajistis mete manda dèyè Fritz Aubourg, ansyen Direktè Adjwen afè jidisyè nan Ministè jistis ak sekirite piblik, ki pa ka kite peyi a. Konsa tou otorite yo te kontinye travay apre gwo sezi sa.

Kèk jou apre Komisè Virgile te fin deside lage moun yo te arete nan dosye kagezon sa, lapolis ak ladwann ta pral fè yon gwo kou. Lapolis bò kote pa l sezi 25 mil katouch nan yon machin ki ta prale Pòtoprens. Ajan ladwann yo bò kote pa yo, yon ti tan apre te tonbe sou yon lót kagezon zam nan yon bato dapre sa Rezolatibonit te fè konnen.

Ayè jedi 21 jiyè a, ajan ladwann yo jwenn lòt kagezon ankò. Yo jwenn 7 pistolè (2 9 millimèt, 4 40 epi yon 38), 434 katouch (197 katouch 9 milimèt, 182 katouch 40 epi 55 katouch 38). Yo te jwenn tou 2 chajè 9 milimèt epi 4 chajè 40.

Ak bout zong yo, san ekipman modèn ki apwopriye ajan dwanye yo rive jwenn tout sa yo. Si yo te gen ekipman an plis volonte yo menm? Men tou, pa rapò a kantite minisyon ki jwenn yo, nou oblije mande tèt nou si se pa nan ladwann Pòdepè anpil zam ak minisyon ki mete dlo nan je popilasyon an te pase?

Paul MARTIAL

A lire aussi

• Lapli vini m a ba w bonbon!
• Pral gen kouri?
• Ariel, kote fig la?
• Dosye kagezon bal Pòdepè : lapolis arete, lajistis libere

Thèmes associés

• Ensekirite
• Trafik zam ak Bal
• Pòdepè