Pral gen kouri?

Depatman Deta Etazini mande sitwayen ameriken pou yo prepare yo pou kite peyi a byen vit. Kidnapin k ap taye banda nan Taba ak Vivi Mitchèl, "afwontman" ant lapolis ak gang yo ta rezon ki pouse yo pran desizyon fè resòtisan yo rekòmandasyon sa. Yo mande fanmiy anplwaye gouvenman ameriken an ansanm ak pèsonèl ki pa esansyèl nan anbasad la pou kite peyi a. Bouda nini! Pa gen anyen ki chanje anba solèy peyi Dayiti a. Se pa jodia moun ap plede viktim ensekirite a. Bandi ak zam fann fwa ap elaji teritwa yo. Poukisa Depatman Deta mande sa konnya ? 

Ensekirite ap vale teren nan peyi sa depi prèske 5 lane. Gen kote ki potko te viktim de li. Zafè kabrit pa zafè mouton! Se konsa anpil moun te konn aji. Ensekirite a te Lasalin, Matisan, Bèlè, nan bout anba Dèlma, sa pa t pwoblèm. Dayè bri bal la pa t konn anpeche moun lòt kote yo dòmi. Ayiti pa yo a diferan. Yo te jis bliye : bouton se chimen maleng.

Nan aksèpte gen teritwa ki pèdi, nan kite se popilasyon an k ap kouri pou bandi oubyen ki deside kanpe goumen ak resous li yo ki limite, Leta peyi a lakoz nou fas a sitiyasyon sa jounen jodia. Yon sitiyasyon malouk! Poutan dènye mesaj Depatman Deta Etazini, peyi kote pi fò zam ki nan men bandi yo soti a, ta vle fè n kwè tout sa n t ap viv la se te tòkèt la. Chay la ap vini.

Kòman sa ka vin pi mal pou popilasyon an? Se pa jodia bandi ak zam nan divès kwen nan peyi a ap mete dlo nan je popilasyon an. Yo touye, yo vyole, yo boule, yo kale, yo imilye moun yo vle lè yo vle. Nan lari moun pa an pè. Anndan kay la menm ou gen perèz ou pa konn si yo p ap vin pran w. Se vre sitiyasyon an pa malouk menm jan tout kote, men pèsonn pa konnen ki lè banda a ap chanje nan zòn bò lakay li. Bandi ap pouse tankou djondjon pandan lapolis la ap pèdi efektif.

Polisye ki pa ka tann imel Biden nan lage kò yo kay vwazen oubyen Naso ak Pwovo. Nou pa ka repwoche polisye yo, moun sa yo, ki ap chèche sove lavi yo paske anpil fwa yo itilize yo tankou kobay pandan se pa tretman an ki miyò pase sa.

Poukisa pandan n gentan gen apse sou klou a epi Depatman Deta pran desizyon sa? Poukisa enstitisyon peyi Etazini ki se yon "alye" lapolis la pale de "afwontman" ant lapolis ak gang olye de operasyon lapolis? Kisa k ap kit sou do la Repiblik menm? Eske sa ka vin pi mal? Tankou Pè Toma, n ap rete sib?

Si bagay yo pral pi mal, ki kote n prale? Kiyès ki gen souf pou kouri ankò? Lapolis la pa ka kouri dèyè bandi men depi se sitin kont ensekirite, depi se manifestasyon pou mande bon jan kondisyon pou moun viv nan peyi a, depi se moun k ap kouri pou ensekirite epi al geri bosko yo devan anbasad Etazini, lapolis la reponn prezan. Dan pouri toujou gen fòs sou bannann mi ! Yo pran nou an otaj nan pwòp peyi n. Nou pa ka sikile lib e libè. Kisa ki ka fèt pou sa chanje? Kòman nou ka pran desten nou an men ?

Louvencky FRANÇOIS

A lire aussi

• Papa Deslin vin pran yo!
• Lapli vini m a ba w bonbon!
• Se aksyon Konsèy Prezidansyèl la k ap montre si l vle fè ripti vre, pozisyon yon goup sitwayen nan Okap
• Yo koken, yo mètdam
• 12 janvye 2010, Bondye te sispann bon?
• Jounen entènasyonal dwa moun: Tout moun se moun
• Fondasyon Zanmi Timoun p ap bese bra l

Thèmes associés

• Ensekirite
• Ayiti
• Depatman Deta
• Etazini