Dapre PAM, plis pase yon milyon moun nan Pòtoprens nan ensekirite alimantè

Pwogram alimantè mondyak (PAM), mande otorite an Ayiti yo pou voye je sou ensekirite alimantè a ki se yon kalamite k’ap vale teren nan peyi a. Nan Pòtoprens sèlman, plis pase yon milyon moun ap soufri akoz yo pa ka jwenn manje. Yo ap tann yon entèvansyon rapid.

Dènye tan sa yo, gen plis moun ki vin nan sitiyasyon malouk sa. Gwoup nèg ak gwo zam k’ap pouse tankou djondjon nan zòn kapital la se yonn nan rezon ki lakoz sa. Anplis yo anpeche moun ak machandiz sikile lib e libè, gwoup moun ak zam sa yo ap goumen ant yo nan plizyè katye ki tou pre kapital la. Sitiyasyon sa lakoz sitwayen onèt epi pezib oblije kouri kite kay yo, biznis ki nan zòn nan oblije fèmen pòt yo tou, elatriye. Kòm rezilta: "plis pase yon milyon moun nan ensekirite alimantè" se sa Direktè PAM an Ayiti, Jean Martin BAEUR fè konnen.

''Pandan 90 dènye jou yo, sitiyasyon an vin pi mal. Pèsonn pa gen kontwòl li dapre enfòmasyon nou genyen. Plis pase yon milyon moun nan pi wo nivo ensekirite alimantè'' dapre responsab òganis nasyon zini ak FAO sa ede moun nan bay manje.

Pwoblèm ensekirite alimantè sa toupatou. Dapre Konsèy nasyonal pou sekirite alimantè, plis pase 4.5 milyon moun pa ka jwenn manje nan peyi a. Fas a reyalite sa, gouvènman an prevwa dekese 4 milya goud, yon fason pou li ka tante rezoud pwoblèm sa ki grav anpil. Malerezman se menm ti chante a: pwogram asistans sosyal ki an reyalite p’ap bay okenn rezilta vre. Moun ki rich yo pral vin pi rich sou do malere yo. 

Ki jou se moun chodyè a monte sou non yo a ki va jwenn manje lè li pare?

Annie FRANÇOIS

A lire aussi

• Bon konba!
• Chanm Komès Ayisyano Afriken pran nesans !
• Etazini mande plis angajman pou soutni Fòs Represyon Gang yo
• Sanksyon nan Legliz Batis : yon zouti restorasyon oubyen yon mwayen pou avili moun ?
• Papa Deslin vin pran yo!
• Lapli vini m a ba w bonbon!
• Se aksyon Konsèy Prezidansyèl la k ap montre si l vle fè ripti vre, pozisyon yon goup sitwayen nan Okap

Thèmes associés

• PAM
• Ayiti
• Ensekirite alimantè
• Jean Martin BAEUR