Pòtoprens vann ou li pa ba w papye!

Pòtoprens defigire. Kèk kote moun ka sikile yo pa sanble ak sa yo te ye avan. Anpil kous machin pa egziste ankò. Anpil estasyon machin pa egziste ankò, gen nan yo ki chanje adrès. Menm si w tande yon machin ap rele Pòtay Leyogàn li p ap rive la vre. Mekanisyen ri channmas yo lage kò yo sou Bwa Vèna. Ti mesye ki konn ranje telefòn bò katedral yo fè yon ti deplase. Pa mande m pou Kwa Bosal. Anpil repè disparèt. Gen ri ki gen baryè tankou se nan lakou yon moun w ap antre.

Lontan lè yon chofè konn ap fè dezòd nan lari a, yo konn mande l si se lajan li pa genyen ki fè l poko mete baryè. Ti koze sa te la pou raple l sajman lari a se pou nou tout, lari a se salon pèp la pèsonn pa ka pran l tankou byen prive l. Menm lè machann tout kalite pwodwi te konn anvayi lari a, sa pa t anpeche l byen nou tout. Jodia sanble gen bout nan lari a ki pa pou nou tout. Gen ri nan kapital la machin pa ka sikile jan yo vle nan yo ankò. Lè se pa bandi ki fè n pè ale la se malere ak malerèz ki pran dispozisyon pou pwoteje lavi yo.

Gwo baryè an fè fòje monte nan tout pwent yon seri katye. Moun yo ap kontwole moun k ap antre e gen baryè se apye ou ka pase nan yo sèlman. Gen orè pou w ka pase nan yon seri zòn. Epi si w pa gen moun ki rekonèt ou la, yo konseye w pa pase ditou. Laperèz anvayi tout moun. Chak moun ap barikade tèt yo nan zòn yo. Sa ki pa mete machin an kwa ak lòt bagay pou bare wout la, mete baryè. Pou yo, sa ap anpeche bandi pran zòn nan. Ou menm ki pa t nan kapital pandan yon ti tan ou oblije fè mizajou paske gen wout ou te konn pase nan yo ou p ap ka fè sa ankò.

Ensekirite k ap vale teren an lakoz kapital peyi a vin redesinen. Popilasyon an oblije adapte l a reyalite sa l ap viv la. Moun ki te gen gwo kay yo oblije kouri kite l pou al abrite yo nan kan. Nan yon bat je, yo pèdi sa yo te pran ane pou m pa di tout vi yo pou yo konstwi. San yo pa mande yo si yo dakò bandi ak gwo zam fè yo kouri kite konfò yo. Nou p ap janm ka konnen ki kantite ki pa gen chans kouri. Bandi achte yon bon pati nan kapital la lajan kontan. Se yo ki lalwa, se yo k ap koupe se yo k ap rache. Yo vle enpoze yo kòm nouvo pwopriyetè poutan gen yon jou k ap rive, yo pral rann yo kont Pòtoprens pat vann yo alewè pou l ta bay yo papye!

Louvencky FRANCOIS