Didier me gaz ou, jwe!

Se vre Iran byen lwen nou, men menm jan ak tout planèt la nou menm an Ayiti ta dwe viv konsekans lagè sa ki pa manke fè pri petwòl ak pwodwi ki derive de li yo monte. Moun Etazini gentan ap rele anmwey pou pri gaz, nou menm isit nou poko konn bagay konsa!

Se vre, kontrèman a sa kit e prevwa pri gaz la pa janm ajiste vre a evolisyon mache a. Depi gen ogmantasyon pri sou mache entènasyonal la, gaz la tou monte isit. Li p ap desann non lè sa fèt sou mache a. Met sous a, nan kèk kwen nan peyi a tankou depatman nò, majorite nan ponp yo pa rèspèkte pri Leta fikse a. Chak ponp vann nan pri pa yo, ponpis tounen elèv lekòl k ap fè pwodwi kwaze pou yok a wè ki kantite gaz pou yo ba w pou lajan w la paske se pa pri ki afiche nan ponp la yo ap vann gaz la. Dezòd sa ap fèt anba je otorite yo e chak fwa yonn deside di li pral konbat li swa li pèdi djòb li oubyen li rete li bliye si l t ap Mennen yon batay pou yon bagay konsa.

Mèt ponp sa yo fè kwè se paske yo oblije peye bandi ki fè yo pa ka vann nan pri Leta fikse a. Ta sanble kamyon gaz ki alimante 2 grenn ponp ki rèspèkte pri otorite yo fikse a pa pase nan menm wout la. Antouka, se mal sele ki toujou foule, nan ka peyi dayiti se pitit sòyèt ki toujou foule. Pèp la ap peye pri ensekirite a nan tout san, se li k ap kouri anba bal, se kay li boule, se li bandi vyole, touye epi se li ankò k ap peye po kase a. Pandanstan, se menm ensekirite sa k ap fè richès yon lòt gwoup.

Machin ensekirite a toujou gen gaz paske l regle koze nèg isit. Egzamen ofisyèl ak tout lòt aktivite fèt tout kote nan peyi a, pa mande si «teritwa pèdi» yo ladan l tou! Poutan kan se pou fè eleksyon tout antreprenè politik di fòk gen eleksyon. Tranzisyon an twò dous, moun ki pa t ap ka fè 500 vwa nan eleksyon ap koupe epi rache pandan sitiyasyon pèp la ap pi mal chak jou. Jodia se yo k ap travay sou lopinyon piblik la pou fè n dakò tranzisyon sa poko ka fini e se yo menm ki pral vin jistifye monte pri gaz la. Moun ki te voye pye 6-7 jiyè 2018 paske Prezidan Jovenel te deside ajiste pri gaz la panse jodia yo pral fè pèp la vale desizyon ogmante pri gaz la. Anpil fwa, baton ki bat chyen nwa a se li ki bat chyen blan an. Didier me gaz ou, monte l non!

Stevens JEAN FRANÇOIS

A lire aussi

• Sa k pa pè a jete !
• Qui partira et qui restera ?
• Détention préventive prolongée : l’État lance une caravane pour désengorger les prisons
• Laurent Saint-Cyr refuse « toute initiative fondée sur des calculs individuels »
• Vers un retour à l’ordre constitutionnel : le Premier ministre met le cap sur les élections
• Les Etats-Unis assument la nomination d'Alix Didier Fils-Aimé
• « J’ai décidé de m’impliquer dans la politique après avoir constaté la misère de la population » avait indiqué Alix Didier Fils-Aimé

Thèmes associés

• Alix Didier Fils-Aimé
• Tranzisyon
• Pri gaz