Nou bouke!

Nou bouke ak swadizan otorite ki pa sispann fè nou tande menm diskou yo, menm pwomès resikle yo, menm angajman yo anonse ak anpil bri pandan se toujou gwo van ti lapli paske pawòl sa jis al gwosi pil tout koze ki pale pandan yo pa janm tounen aksyon. Chak nouvo responsab rive ak yon lis gwo pwojè, yon pakèt deklarasyon, yon langaj ki vle fè kwè demen ap pi bèl. Men demen sa a sanble toujou pran yon lòt direksyon.

Nou bouke wè konferans pou laprès oubyen kominike kote yo fè pwopagann pou yon ti aksyon ki ta dwe nòmal nan fonksyònman yon Leta. Yon ti reparasyon tounen yon "gwo reyalizasyon". Yon distribisyon 2 sachè manje vin tounen yon "pwogram istorik". Yon reyinyon vin prezante tankou yon "viktwa". Pandanstan, dèyè kamera yo, lavi kontinye ap degrade.

Reyalite a pa bezwen makiyaj. Li pa bezwen slogan ni gwo afich. Gen fanmi ki pa konnen ki jan y ap jwenn manje pou demen. Gen jèn ki pa wè okenn avni devan yo. Gen antreprenè k ap lite pou kenbe pòt biznis yo louvri. Gen timoun ki pèdi dwa yo genyen pou yo aprann nan lapè. Gen malad ki pa jwenn swen yo bezwen. Sitwayen yo pa menm santi yo gen dwa sikile san kè sote. Sa yo pa envansyon. Se lavi chak jou.

Yon pèp pa manje ak pwomès. Li pa viv ak deklarasyon. Li pa bati espwa sou konferans pou laprès. Sa li bezwen se : rezilta, sèvis piblik ki mache, enstitisyon ki bay rannman, sekirite, jistis, respè dwa li, elatriye.

Lè otorite yo pase plis tan ap vann imaj yo olye yo chèche rezoud pwoblèm popilasyon an, se yon move siy. Lè kominikasyon vin pi enpòtan pase aksyon, lè pwopagann pran plas bilan, lè estatistik chwazi ranplase eksperyans moun k ap soufri, se pa sèlman konfyans ki kraze: se relasyon ant dirijan ak dirije yo ki vin pi frajil.

Yon demokrasi pa mezire ak kantite pwomès yon gouvènman fè. Li mezire ak kantite pwomès li kenbe. Yon administrasyon pa vin efikas paske li di li efikas. Se sitwayen yo ki dwe kapab santi diferans lan nan lavi yo.

Pèp ayisyen an montre anpil pasyans. Twòp pasyans menm. Li kontinye leve chak maten malgre tout difikilte yo. Li kontinye travay, lite, envante mwayen pou l viv, sipòte chay ki pa ta dwe sou zepòl li. Men pinga nou panse pasyans se rezinyasyon. Pèp la pa bezwen plis diskou, li bezwen plis responsablite. Pèp la pa bezwen plis pwopagann, li bezwen plis transparans. Pèp la pa bezwen plis seremoni pou selebre ti pa, li bezwen gwo chanjman ki gen enpak sou lavi moun. Sa pa yon kesyon politik se pito egzijans pou otorite yo respèkte sitwayen yo.

Yon pèp ki kontinye bay tout sa li kapab pou kenbe peyi a kanpe merite plis pase bèl pawòl. Li merite dirijan ki rann kont. Li merite aksyon ki mezire. Li merite rezilta ki vizib. Paske, nan bout tout refleksyon an, yon verite rete kanpe tankou yon poto mitan: Pèp ayisyen an pa merite sa! Me koze ki dwe klewonnen nan tout medya yo.

Stevens JEAN FRANÇOIS