Bòn fèt papa, ou merite l!

"Papa se poto mitan fanmiy la! Menm si l sou baton, prezans papa a atire respè ak lòd. Depi papa la gen vakabon ki pap oze vin fè nenpòt bagay. Yo di sa, kabrit gade figi mèt jaden avan l antre." Pawòl sa yo ki se yon ti bout nan anpil lòt, yon pè Legliz Katolik te di nan prèch li maten an pa depaman ap sa nou konn tande nan jou sa ak nan lòt okazyon. Papa se senbòl otorite e otorite papa a se manman an ki bay li. Moun ki li nan gwo liv ka gen pwoblèm ak modèl patriyaka a ki di se papa a ki bay timoun nan prensip gwoup sosyal la epi fè l antre ladan l. Tout sa montre responsablite papa. Isit, dapre anpil moun, absans papa gen anpil konsekans sou avni timoun yo.

Malgre pa gen okenn estatistik ki kore sa, anpil moun ret kwè se paske yo pat gen papa ki pou te kenbe men yo ki fè anpil timoun vin devni bandi gran chimen, delenkan. La nou retounen ankò ak devwa papa a pou l ka bay timoun nan prensip ki ap dirije lavi moun nan sosyete a. Petèt sa se yonn nan rezon ki fè yo ap ankouraje papa ki pran responsablite yo, sa ki pa annik bay gòl epi kouri yo.

Se vre pa gen menm angouman ak fèt manman yo, men isit, chak jou ki pase fèt sa ap pran plis anplè, plis moun ap selebre l. Èske se paske vin gen plis papa rèsponsab? Sa ki si se plis moun vin pran konsyans sakrifis papa yo ap fè pou fè edikasyon pitit yo! Jounen jodia nou gen mesye Sawo (gason ki ap fè menm aktivite ak madan Sara yo), gason yo pa senpman vann fòs kouraj yo pou fè lajan pou pran swen fanmiy yo. Yo fè komès tou e yo fè tout kalite komès. Sosyete a vin rann li kont de sa.

Gen move tout kote! Pa gen move papa! Paske se pa tout gason ki gen pitit ki papa. Nou menm nan kreyòl la nou gen yon grenn mo : "papa", mo sa marande ak sans responsablite, sakrifis elatriye! Pa gen papa ki pa merite n di yo "Bòn fèt!"

Stevens JEAN FRANÇOIS 

Chef de l'information

A lire aussi

• Papa Deslin vin pran yo!
• Lapli vini m a ba w bonbon!
• Se aksyon Konsèy Prezidansyèl la k ap montre si l vle fè ripti vre, pozisyon yon goup sitwayen nan Okap
• Yo koken, yo mètdam
• 12 janvye 2010, Bondye te sispann bon?
• Jounen entènasyonal dwa moun: Tout moun se moun
• Fondasyon Zanmi Timoun p ap bese bra l

Thèmes associés

• Ayiti
• Fèt
• Papa